नांदेडचे ज्येष्ठ सामाजिक कार्यकर्ते लक्ष्मणराव भवरे यांना ‘भारतरत्न डॉ. बाबासाहेब आंबेडकर राष्ट्रीय प्रेरणा पुरस्कार’ जाहीर
आंबेडकर परिवारातील सदस्यांच्या हस्ते नाशिकमध्ये आज होणार सन्मान
New Bharat Times नेटवर्क
नांदेड: नांदेड येथील ज्येष्ठ सामाजिक कार्यकर्ते आणि पत्रकार लक्ष्मणराव मारोतीराव भवरे (कामारीकर) यांना या वर्षाचा प्रतिष्ठित ‘भारतरत्न डॉ. बाबासाहेब आंबेडकर राष्ट्रीय प्रेरणा पुरस्कार’ जाहीर झाला आहे. ज्ञानदिप सामाजिक विकास संस्था, महाराष्ट्र यांच्या वतीने देशभरात विविध क्षेत्रांत उल्लेखनीय कार्य करणाऱ्या मान्यवरांना हा पुरस्कार देऊन गौरविण्यात येते. यंदाच्या पुरस्कारार्थींमध्ये नांदेडचे सुपुत्र लक्ष्मणराव भवरे यांचा गौरव केला जाणार आहे.
हा पुरस्कार प्रदान सोहळा शनिवार, दिनांक २३ मे रोजी नाशिक येथील समुद्र लॉन्स येथे अत्यंत दिमाखात पार पडणार आहे.
महामानव डॉ. बाबासाहेब आंबेडकर यांच्या जयंतीचे औचित्य साधून आयोजित या सोहळ्यात आंबेडकर परिवारातील सदस्यांच्या हस्ते हा पुरस्कार प्रदान करण्यात येईल. यामध्ये डॉ. बाबासाहेब आंबेडकरांचे नातू, इंदू मिल स्मारकाचे प्रणेते व रिपब्लिकन सेनेचे सरसेनापती आनंदराज आंबेडकर तसेच त्यांचे पणतू व रिपब्लिकन सेनेचे युवानेते अॅड. अमन आंबेडकर प्रामुख्याने उपस्थित राहणार आहेत.
याशिवाय, नाशिकचे पोलीस आयुक्त संदीप कर्णिक, सामाजिक न्याय व विशेष सहाय्य विभागाचे उपायुक्त भगवान वीर, जिल्हा पुरवठा अधिकारी रमेश गायकवाड, नाशिक मनपाचे सहाय्यक उपायुक्त नानासाहेब साळवे, रिपब्लिकन सेनेचे राज्य प्रवक्ते अविनाश शिंदे, दै. महासागरचे वृत्त संपादक सुधीर उमराळकर, दै. लोकनामाचे वृत्त संपादक दिनेश जाधव आणि भिमकन्या रीलस्टार आसावरी बर्वे आदी मान्यवर या सोहळ्याला उपस्थित राहणार आहेत.
लक्ष्मणराव भवरे यांनी आपल्या लेखणीच्या माध्यमातून नेहमीच सामाजिक बांधिलकी जोपासली आहे. जनसामान्यांचे प्रश्न प्रशासनासमोर परखडपणे मांडण्यासोबतच त्यांनी: भारतीय संविधानाचा प्रचार आणि प्रसार प्रभावीपणे केला आहे. पर्यावरण संवर्धनासाठी वृक्षलागवड व संगोपनात मोलाचे योगदान दिले आहे. शैक्षणिक, सांस्कृतिक, धार्मिक आणि राजकीय क्षेत्रांतही त्यांचा नेहमीच सक्रिय सहभाग राहिला आहे.
त्यांच्या याच अविरत कार्य आणि कर्तव्यतत्परतेची दखल घेऊन निवड समितीने त्यांची या पुरस्कारासाठी निवड केल्याची माहिती ज्ञानदिप सामाजिक विकास संस्थेचे अध्यक्ष डॉ. अनिल आठवले आणि सचिव मिलिंद कळवणकर यांनी दिली आहे.
लक्ष्मणराव भवरे यांना हा राष्ट्रीय पुरस्कार जाहीर झाल्याबद्दल नांदेडसह संपूर्ण जिल्ह्यातून आणि विविध स्तरांतून त्यांच्यावर कौतुक व अभिनंदनाचा वर्षाव होत आहे.
