नरसी येथील ‘राज बार’वर पोलिसांचा छापा; कुंटणखान्याचा पर्दाफाश, ६ महिलांची सुटका
मोरे मनोहर
किनाळा : देगलूर राज्य महामार्गावरील नरसी शिवारात असलेल्या ‘राज बार अँड रेस्टॉरंट’मध्ये सुरू असलेल्या देहविक्रीच्या व्यवसायावर पोलिसांनी धाड टाकली आहे. या धडक कारवाईत सहा पीडित महिलांची सुटका करण्यात आली असून, दोन चालकांना अटक करण्यात आली आहे. पोलिसांनी या कारवाईत ६ लाख ७ हजार ५०० रुपयांचा मुद्देमाल जप्त केला आहे.
बिलोलीचे उपविभागीय पोलीस अधिकारी श्याम पानेगावकर यांना नरसी येथील राज बारमध्ये अवैध देहविक्री सुरू असल्याची गोपनीय माहिती मिळाली होती. या माहितीची शहानिशा करण्यासाठी पोलिसांनी सोमवारी (६ एप्रिल) एक डमी ग्राहक पाठवला. खात्री पटल्यानंतर पंचांच्या उपस्थितीत बारच्या पहिल्या मजल्यावर छापा टाकला असता, तिथे वेश्याव्यवसाय सुरू असल्याचे उघड झाले.
या छाप्यात पोलिसांनी खालील आरोपींना ताब्यात घेतले आहे: संतोष श्रीपत पवळे (वय ३० वर्ष, रा. बालाजी नगर, नरसी), शिवराज श्रीपत पवळे (वय ३५ वर्ष, रा. बालाजी नगर, नरसी)
तपासादरम्यान सोहेल शेख (रा. पनवेल, मुंबई) हा आरोपी मुंबईहून महिलांना आणून पुरवण्याचे काम करत असल्याचे समोर आले आहे. पोलिसांनी घटनास्थळावरून खालील मुद्देमाल जप्त केला:
- नगद रक्कम: ४७,५०० रुपये.
- मोबाईल: विविध कंपन्यांचे ६ संच.
- वाहन: एक कार (क्रमांक MH 12 SY 6411).
- एकूण किंमत: ₹ ६,०७,५००/-
सुटका करण्यात आलेल्या सहा महिलांची वैद्यकीय तपासणी करण्यात आली आहे. त्यांना पुढील पुनर्वसनासाठी सुरक्षित संस्थांकडे पाठवण्याची प्रक्रिया पोलीस प्रशासनाकडून सुरू आहे.
जिल्हा पोलीस अधीक्षक अविनाश कुमार यांच्या मार्गदर्शनाखाली उपविभागीय अधिकारी श्याम पानेगावकर, नायगाव व बिलोली पोलीस कर्मचाऱ्यांनी ही यशस्वी कामगिरी केली. या कारवाईबद्दल पोलीस अधीक्षकांनी पथकाचे विशेष कौतुक केले आहे. याप्रकरणी रामतीर्थ पोलीस ठाण्यात अनैतिक व्यापार प्रतिबंधक कायद्यान्वये (PITA) गुन्हा दाखल करण्याची प्रक्रिया रात्री उशिरापर्यंत सुरू होती.
