मारहाणीची धमकी दिल्यामुळे आत्महत्या करत असल्याचा व्हिडीओ स्टेटसला ठेवलेल्या तरुणाचा मृतदेह तलावात सापडला
अंकुशकुमार देगावकर
नायगाव : अपघातातील नुकसान भरपाई देण्यासाठी भावकीच्या लोकांनी शिविगाळ करुन मारण्याची धमकी दिली. तालुक्यातील निळेगव्हाण येथील श्याम यशवंत जाधव (20) या तरुणाने व्हिडीओ तयार केला यात धमकी देणाऱ्यांची नावे घेतला आणि धमकी दिल्यामुळे मी आत्महत्या करत आहे असे नमूद करुन तो दि. 14 रोजी घरातून बाहेर पडला. घराबाहेर पडलेल्या तरुणाचा मृतदेह कुष्णूर येथील पाझर तलावात दि. 15 रोजी सकाळी सापडला. यामुळे एकच खळबळ उडाली असून संबधीतावर गुन्हे नोंद करण्याची मागणी मयत तरुणाच्या नातेवाईकांनी केली आहे.
नायगाव तालुक्यातील निळेगव्हाण येथील तरुण श्याम यशवंत जाधव यांच्या गाडीचा अपघात झाला होता. यात माझ्या गाडीचे मोठे नुकसान झाले असून नुकसान भरपाई म्हणून भावकीच्या माणसांनी १ लाखाची मागणी केली होती. जाधव यांची परिस्थिती नसल्याने श्याम जाधवच्या वडीलांनी ५० हजार देण्याचे आश्वासन दिले. वादावादी घटनेत तरुणाच्या आईला भोवळ आल्याने ती जमीनीवर कोसळली. त्यामुळे घरातील मंडळी रुग्णालयात गेली होती तर श्याम हा घरीच होता. ही संधी साधून भावकीची मंडळी घरी आली आणि पुन्हा धमकी देवून गेले. यापूर्वी श्याम जाधव याला मारहाण करण्यात आली होती त्यामुळे आपल्याला मारहाण सहन होत नाही त्यामुळे त्याने आत्महत्या करण्याचा निर्णय घेतला.
सर्व घटनेचा सविस्तर व्हिडीओ तयार केला आणि या व्हिडीओत मारहाण करणाऱ्या़ची नावे घेतली आणि मी आत्महत्या करणार आहे असे नमूद करुन तो व्हिडीओ आपल्या स्टेटस ला ठेवून तो दि. 14 रोजी दुपारी घरातून बाहेर पडला. घरची मंडळी परत आल्यानंतर श्याम घरी नसल्याचे दिसून आले त्यामुळे शोधाशोध केली पण संपर्क झाला नाही सायंकाळी कुंटूर पोलिसांना याची माहिती देण्यात आली. कुंटूर पोलिसांनी शोध घ्या असे सांगून आपली जबाबदार पुर्ण केली. रात्रभर शोध घेतल्यानंतर कुष्णूर येथील तलावाच्या बाजूला श्याम जाधव याचा मोबाईल सापडला.
त्यांनतर नातेवाईकांनी शोध घेतला असता श्याम जाधव याचा मृतदेह दि.15 रोजी सकाळी तलावात आढळून आला. घटनेची माहिती कुंटूर पोलिसांना देण्यात आली त्यानंतर पोलिस घटनास्थळी आले. मृतदेह बाहेर काढण्यात आला असून उत्तरीय तपासणीसाठी नायगाव येथील रुग्णालयात पाठवण्यात आला आहे. या प्रकरणी तक्रार देण्याची तयारी सुरु आहे.
