संविधान अमृत महोत्सवानिमित्त नांदेडात ३ व ४ मार्च रोजी वैचारिक व सांस्कृतिक जागर
जयवर्धन भोसीकर
नांदेड :- जगभरात युध्द, संघर्ष, अस्थितरता, तणाव व अराजकतेचा उन्माद माजला असताना प्रजासत्ताक भारताची वाटचाल अत्यंत दिमाखदारपणे करण्यात निर्णायक भूमिका बजावणाऱ्या संविधानाचा गौरव आणि संविधान निर्माते भारतरत्न डॉ. बाबासाहेब आंबेडकरांना मानवंदना देण्याच्या हेतुने नांदेड नगरीत ३ व ४ मार्च रोजी होणाऱ्या संविधान अमृत महोत्सवाची जोरदार तयारी सुरू असून दिग्गजांची उपस्थिती महोत्सवास लाभणार असल्याची माहिती महोत्सवाचे उद्घाटक खा.रविंद्र चव्हाण यांच्या प्रमुख उपस्थितीत घेण्यात आलेल्या भरगच्च पत्रकार परिषदेत स्वागताध्यक्ष राजेश पावडे, महेश देशमुख (अध्यक्ष, संयोजन समिती), प्रफुल्ल सावंत (निमंत्रक), डॉ.गंगाधर सोनकांबळे (संयोजक), सत्यपाल सावंत (कार्याध्यक्ष) यांनी दिली. यावेळी जी.पी. मिसाळे, राज गोडबोले, अजय एडके, डॉ.भिमराव हाटकर, प्रभु ढवळे व बी.आर.फाऊंडेशनचे कोंडदेव हाटकर यांची उपस्थिती होती.
बुध्दीस्ट रिसर्च फाऊंडेशनच्यावतीने नांदेड येथील कुसूम सभागृहात संपन्न होणाऱ्या संविधान महोत्सवाचे उ‌द्घाटन दि. ३ मार्च रोजी सायंकाळी ६ वाजता खा.रंविद्र चव्हाण यांचे हस्ते होणार असून अध्यक्षस्थानी माजी सनदी अधिकारी एकनाथ मोरे राहणार आहेत. ख्यातकिर्त विधिज्ञ माजी न्यायमूर्ती बी.जी.कोळसे पाटील यांचे प्रमुख व्याख्यान होणार असून महोत्सवात गोरक्ष लोखंडे (पुणे), प्राचार्य डॉ.सुभाष गवई (अमरावती), डॉ.बबन जोगदंड (यशदा, पुणे) व प्रा.डॉ.कविता सोनकांबळे यांचे मार्गदर्शन होणार आहे. मंचावर आनंद चव्हाण (माजी महापौर), कामाजी पवार (मराठा सेवा संघ), दशरथराव लोहबंदे, बालाजी इबितदार (ओबीसी नेते), अॅड. एम.झेड.सिध्दीकी, इंजि.चंद्रप्रकाश देगलूरकर, अशोक पेद्देवाड, शंकर शिंदे व बा.रा. वाघमारे यांची उपस्थिती राहणार आहे.
या महोत्सवाच्या औचित्याने डॉ. बाबासाहेब आंबेडकर ग्रेट डिव्होटी अवार्ड स्मृतिशेष दादासाहेब गायकवाड यांना जाहिर झाला असून त्यांचे पुतणे प्रभाकर गायकवाड (नाशिक) हे हा पुरस्कार स्वीकारतील. संविधानाचा अविरत प्रचार व प्रसार करणारे ह.भ.प.गुरुवर्य अच्युत महाराज दस्तापूरकर, डॉ.सिध्दार्थ हत्तीअंबीरे (परभणी), यशवंत निखाते, दीपक कदम (प्रमुख आंबेडकरवादी मिशन), डॉ.गंगाधर सोनकांबळे (संविधान अकॅडमी), प्रा. डॉ.अनंत राऊत, दत्ता तुमवाड, कामगार नेते गणेश शिंगे व सामाजिक कार्यकर्ते सुरेश हाटकर या मान्यवरांना संविधान भुषण पुरस्काराने गौरविण्यात येणार आहे. तसेच संविधान अमृत चषक राज्यस्तरीय निबंध स्पर्धेच्या विजेत्यांचे पारितोषिक वितरणही होणार आहे.
दुसऱ्या दिवशी ४ मार्च रोजी होणाऱ्या सांस्कृतिक कार्यक्रमात ख्यातनाम आंबेडकरी गायिका कडुबाई खरात यांच्या गीतगायना कार्यक्रम होणार असून डॉ.विजय कदम (मुंबई), इंदिरा अस्वार (बार्टी, पुणे), निशांत धापसे (सिनेदिग्दर्शक, मुंबई), दशरत पाटील (संचालक, आय.आय.बी.), इंजि. संघरत्न सोनसळे, विलास सिंदगीकर (लातूर), प्रशांत वंजारे (अरणी), डॉ.करूणा जमदाडे व डॉ.आशालता गुट्टे यांची उपस्थिती राहणार आहे. गीत, संगीत, कला, साहित्य व सामाजिक चळवळीच्या माध्यमातून कार्य करणाऱ्या कलावंत कार्यकर्त्यांचा गौरव या निमित्ताने होणार आहे. यामध्ये आनंद किर्तने, बालाजी कंठेवाड, डॉ.विलासराज मद्रे, साहेबराव शेळके, सोनु दरेगावकर, प्रा.अविनाश नाईक, छायाबाई चंदेल, संजय निवडंगे, लक्ष्मणराव पवार, गौरव भालेराव, भगवान गायकवाड, उर्मिला सावंत व गिरजाबाई जोगदंड यांचा समावेश आहे.
संविधान महोत्सव परिसराला शहिद सुर्यवंशी यांचे नाव, विचारपीठाला विजय वाकोडे यांचे नाव तर प्रवेशद्वाराला दिवंगत खासदार वसंतरावजी चव्हाण यांचे नाव दिले आहे. सदरील महोत्सवास मोठ्या संख्येने उपस्थित राहावे असे आवाहन करण्यात आले.
असून महोत्सवाच्या यशस्वतीतेसाठी डॉ.राम वनंजे, रामचंद्र देठे, अनिल कांबळे, एन.टी. पंडीत, रमेश कसबे, संजय जाधव, ज्ञानोबा दूधमल, राहुल गवारे, संध्या जांभळे, अंजली मुनेश्वर, बी.आर. फाऊंडेशनच्या अध्यक्ष सुमेधा हाटकर, सचिव अर्चना गवारे, एम.डी. जोंधळे आदि परिश्रम घेत आहेत. राजेश पावडे (स्वागताध्यक्ष), महेश देशमुख (अध्यक्ष, सं. समिती), प्रफुल्ल सावंत (निमंत्रक), गंगाधर सोनकांबळे ( सहसंयोजक), सत्यपाल सावंत (कार्याध्यक्ष).
