मुख्यमंत्री देवेंद्र फडणवीस यांचे अर्थसंकल्प समजण्यासाठी मार्गदर्शक पुस्तक संकेतस्थळावर उपलब्ध
मुंबई (गुरुदत्त वाकदेकर) : येत्या ६ मार्च रोजी मुख्यमंत्री तथा वित्त व नियोजन मंत्री देवेंद्र फडणवीस वर्ष २०२६–२०२७ या आर्थिक वर्षासाठी विधानसभेत अर्थसंकल्प सादर करणार आहेत. अर्थसंकल्प सर्वसामान्यांना सहज समजावा, या उद्देशाने त्यांनी लिहिलेले ‘अर्थसंकल्प सोप्या भाषेत’ हे पुस्तक संकेतस्थळावर उपलब्ध करण्यात आले आहे. नागरिकांना अर्थसंकल्प समजून घेण्यासाठी हे पुस्तक उपयुक्त ठरणार आहे.
राज्याच्या आर्थिक धोरणांचा आराखडा असलेला अर्थसंकल्प सामान्य वाचकांपर्यंत पोहोचावा, यासाठी मुख्यमंत्री फडणवीस यांनी हे पुस्तक लिहिले आहे. ४ मार्च २०२० रोजी नागपूर येथील लाखे प्रकाशन यांनी या पुस्तकाचे प्रकाशन केले होते. तेव्हापासून अर्थसंकल्प समजावून सांगणारे सोपे मार्गदर्शक म्हणून या पुस्तकाची ओळख आहे.
‘बजेट’ शब्दाची उत्पत्ती, अर्थसंकल्प समजण्यापूर्वी आवश्यक बाबी आणि अर्थसंकल्प विषयक संज्ञांचे स्पष्टीकरण पुस्तकात देण्यात आले आहे. मराठी व इंग्रजी शब्दप्रयोगांची तुलना स्पष्ट केली आहे. भारतीय संविधानातील संबंधित तरतुदींचा उल्लेख आहे. अर्थसंकल्पाची रचना, तो तयार होण्याची प्रक्रिया आणि मंजुरीची पायरीवार माहितीही समाविष्ट आहे.
पांढऱ्या मुखपृष्ठाचे अर्थसंकल्पीय अंदाजपत्रक, म्हणजेच व्हाईट बुक, तसेच ग्रीन बुकमधील तरतुदींचे सोप्या भाषेत विश्लेषण करण्यात आले आहे. विभागनिहाय व विकास मंडळनिहाय अनिवार्य विकास खर्चाची माहिती दिली आहे. राज्यघटनेच्या अनुच्छेद ३७१ (२) (ब) नुसार प्रादेशिक अनुशेष निर्मूलनासाठी सादर होणाऱ्या अनुपालन आदेशाचाही ऊहापोह केला आहे. अर्थसंकल्प सादर करणे, मंजूर करणे आणि त्याचे कायद्यात रूपांतर होणे या टप्प्यांचेही स्पष्टीकरण करण्यात आले आहे.
‘अर्थसंकल्प सोप्या भाषेत’ हे पुस्तक https://www.devendrafadnavis.in/budget_2020
या संकेतस्थळावर सर्वांसाठी उपलब्ध आहे. अर्थसंकल्प मांडण्यापूर्वीच त्याची रूपरेषा समजून घेण्याची ही संधी आहे. माहिती व जनसंपर्क महासंचालनालयाच्या नागपूर संचालक कार्यालयाने ही माहिती प्रसिद्धीस दिली आहे. नागरिकांनी या पुस्तकाचा लाभ घ्यावा, असे आवाहन करण्यात आले आहे.
