आरटीई २५ टक्के प्रवेशाची राज्यस्तरीय ऑनलाईन सोडत सोमवारी जाहीर होणार!
प्रकाश महिपाळे
नांदेड : – शिक्षण हक्क कायद्यांतर्गत (RTE) २५ टक्के राखीव जागांवरील प्रवेशाची प्रतीक्षा आता संपली आहे. शैक्षणिक वर्ष २०२६-२७ साठीची राज्यस्तरीय ऑनलाईन प्रवेश सोडत (Lottery) सोमवार, ६ एप्रिल २०२६ रोजी सकाळी ११:०० वाजता काढण्याचे नियोजन करण्यात आले आहे. प्राथमिक शिक्षण संचालनालयाने यासंदर्भात अधिकृत पत्र निर्गमित केले आहे.
पुण्यातील महात्मा फुले सभागृहात होणार सोडत
पुणे येथील महाराष्ट्र राज्य शैक्षणिक संशोधन व प्रशिक्षण परिषद (MSCERT) संकुलातील महात्मा फुले सभागृहात ही सोडत प्रक्रिया पार पडणार आहे. या कार्यक्रमासाठी आवश्यक इंटरनेट सुविधा, बैठक व्यवस्था आणि इतर नियोजनाच्या सूचना शिक्षण संचालकांनी जिल्हा परिषद पुणेच्या शिक्षणाधिकाऱ्यांना दिल्या आहेत.
- विद्यार्थ्यांचा सहभाग: या सोडतीसाठी पुणे जिल्ह्यातील स्थानिक स्वराज्य संस्थांच्या १० विद्यार्थ्यांना निमंत्रित करण्यात येणार आहे. उपस्थित विद्यार्थ्यांचे स्वागत गोष्टींचे पुस्तक, पेन आणि चॉकलेट देऊन केले जाईल.
- पारदर्शकता: या प्रक्रियेवेळी पत्रकार, विविध संस्थांचे चालक, सामाजिक संघटनांचे प्रतिनिधी आणि पालक यांना उपस्थित राहण्याबाबत कळवण्यात आले आहे, जेणेकरून प्रवेश प्रक्रिया पारदर्शक पद्धतीने पार पडेल.
शिक्षण संचालक (प्राथमिक) शरद गोसावी यांनी स्वाक्षरी केलेल्या या पत्रात स्पष्ट करण्यात आले आहे की, या संपूर्ण प्रक्रियेत कोणतीही हलगर्जीपणा किंवा हायगय खपवून घेतली जाणार नाही. संपूर्ण प्रक्रिया अत्यंत दक्ष राहून पार पाडण्याचे आदेश प्रशासनाला देण्यात आले आहेत.
या सोडतीनंतर निवड झालेल्या विद्यार्थ्यांच्या पालकांना एसएमएसद्वारे आणि अधिकृत पोर्टलवर माहिती उपलब्ध करून दिली जाणार आहे. त्यामुळे राज्यातील हजारो पालकांचे लक्ष आता सोमवारच्या लॉटरीकडे लागले आहे.
