लोहपुरुष सरदार वल्लभभाई पटेल यांच्या पुतळ्याकडे सत्ताधाऱ्यांचे दुर्लक्ष

अंकुशकुमार देगावकर

नायगाव : देशाचे पहिले गृहमंत्री लोहपुरुष सरदार वल्लभभाई पटेल यांच्या कारेगाव फाटा ता.धर्माबाद जि.नांदेड येथिल पुर्णाकृती पुतळ्याकडे सत्ताधाऱ्यांकडून मोठे दूर्लक्ष होत आहे. पुतळ्याची दोन्ही हात तुटलेल्या अवस्थेत असून परिसरात घाणीचे साम्राज्य पसरलेले आहे. याबाबतची माहिती मिळाल्यानंतर राष्ट्रवादी काँग्रेस पार्टी-शरदचंद्र पवार पक्षाचे नायगांव तालुकाध्यक्ष पांडुरंग शिंदे मांजरमकर व राष्ट्रवादी किसान सभेचे माजी प्रदेश प्रतिनिधी लक्ष्मणराव मा.भवरे यांनी पक्ष पदाधिकाऱ्यांसह आज येथे आले होते.

प्रारंभी सरदार पटेल यांच्या पुतळ्यास पुष्पहार अर्पण करून त्यांना अभिवादन करण्यात आले. त्यानंतर, पुतळा दुरावस्थेबाबतची माहिती स्थानिक रहिवाशांकडून घेण्यात आली. त्यावर आक्रमकपणे भूमिका मांडून या पुतळ्याची दुरावस्था नव्हे तर, विटंबना असून येत्या स्वातंत्र्यदिनापर्यंत प्रशासन व सत्ताधाऱ्यांकडून याबाबत दखल घ्यावी. अन्यथा येत्या दि.१७ सप्टेंबर मराठवाडा मुक्तिसंग्राम दिनापासून याच ठिकाणी लाक्षणिक उपोषण, रास्तारोको त्याचबरोबर, नव्याने पुतळा उभारण्यासाठी भिकमांगो आदोलन करण्यात येणार असल्याचा एल्गार तालुकाध्यक्ष पांडुरंग शिंदे मांजरमकर यांनी आक्रमकपणे केला.

यावेळी पक्षाचे नायगांव तालुका सरचिटणीस किरण वाघमारे, नायगांव शहराध्यक्ष संजय पाटील चव्हाण,नरसी शहराध्यक्ष दिनेश सुर्यवंशी, बाळू गायकवाड आदी पदाधिकाऱ्यांसह कार्यकर्ते उपस्थित होते.