‘पार्किन्सनवर बोलू काही’ चर्चासत्राला ज्येष्ठ नागरिकांचा उत्स्फूर्त प्रतिसाद
मुंबई (गुरुदत्त वाकदेकर): यशवंतराव चव्हाण सेंटर व पार्किन्सन’स डिसीज अँड मूव्हमेंट डिसऑर्डर सोसायटी (पीडीएमडीएस) यांच्या संयुक्त विद्यमाने गुरुवार दिनांक २१ मे २०२६ रोजी पु. ल. देशपांडे अकॅडमी मध्ये “पार्किन्सन वर बोलू काही” या विषयावर चर्चासत्र आयोजित करण्यात आले. या कार्यक्रमात पार्किन्सन आजाराविषयी सविस्तर मार्गदर्शन करण्यात आले.
पीडीएमडीएसच्या डॉ. अंजुम तडवी यांनी अत्यंत सोप्या व समजण्यास सुलभ भाषेत उपयुक्त माहिती देऊन उपस्थितांमध्ये या आजाराविषयी जनजागृती केली. त्यांच्या मार्गदर्शनामुळे श्रोत्यांमध्ये आजाराची लक्षणे, काळजी व व्यवस्थापन याविषयी स्पष्टता निर्माण झाली.
मुंबई प्रादेशिक विभागातील जवळजवळ शंभर ज्येष्ठ नागरिकांनी या चर्चासत्रात सक्रिय सहभाग नोंदवला. कार्यक्रमासोबतच काष्ठशिल्पकार शंकरबाबा पापळकर यांच्या काष्ठशिल्पांचे प्रदर्शनही आयोजित करण्यात आले होते. या प्रदर्शनाला उपस्थित ज्येष्ठ नागरिकांनी भेट देऊन उत्स्फूर्त प्रतिसाद दिला.
या कार्यक्रमास फेस्कोम कोकण विभागाचे माजी अध्यक्ष मा. शरद डिचोलकर, आरोग्य, दिव्यांग आणि ज्येष्ठ नागरिक विभागाच्या प्रमुख दिपिका शेरखाने आणि मनिषा खिल्लारे उपस्थित होत्या. तसेच पु. ल. देशपांडे कला अकादमी महाराष्ट्र संचालक मा. मीनल जोगळेकर यांची प्रमुख उपस्थिती लाभली. कला अकादमीच्या प्रमुख वर्षा कराळे यांचे बहुमूल्य सहकार्य लाभले.
या चर्चासत्रातून ज्येष्ठ नागरिकांमध्ये आरोग्यविषयक जागरूकता वाढविण्यात यश आले. उपयुक्त माहिती, तज्ज्ञांचे मार्गदर्शन आणि सामाजिक सहभाग यामुळे कार्यक्रम यशस्वी ठरला.
