निधी अभावी ‘घरकुल’चे हप्ते रखडले ; लाभार्थ्यांना महिनाभर वाट पाहावी लागणार

प्रकाश महिपाळे

​नांदेड :– राज्यातील घरकुल योजनेच्या लाभार्थ्यांसाठी एक महत्त्वाची पण चिंताजनक बातमी समोर आली आहे. शासन स्तरावर उद्भवलेल्या तांत्रिक अडचणींमुळे गेल्या काही दिवसांपासून संपूर्ण राज्यभरातील घरकुल योजनेचे हप्ते रखडले असून, पुढील किमान एक महिना निधी उपलब्ध होण्याची शक्यता कमी असल्याचे प्रशासनाकडून स्पष्ट करण्यात आले आहे.

मिळालेल्या माहितीनुसार, SMURH कार्यालयाकडून पुढील सूचना प्राप्त होईपर्यंत SNA स्पर्श प्रणाली अंतर्गत होणारी FTO (Fund Transfer Order) प्रक्रिया सध्या पूर्णपणे बंद ठेवण्यात आली आहे. यामुळे ज्या लाभार्थ्यांच्या घरांची कामे प्रगतीपथावर आहेत किंवा पूर्ण झाली आहेत, त्यांच्या बँक खात्यात जमा होणारा पुढील हप्ता थांबला आहे.

या तांत्रिक बिघाडामुळे निधी वितरणात अडथळा निर्माण झाला असून, परिस्थिती पूर्वपदावर येण्यासाठी काही कालावधी लागण्याची शक्यता आहे. या पार्श्वभूमीवर संबंधित विभागाने लाभार्थ्यांना खालील आवाहन केले आहे:

• ​संयम ठेवावा: निधी उपलब्ध होताच आणि हप्ते वितरित होण्यास सुरुवात होताच लाभार्थ्यांना तातडीने कळवण्यात येईल.
• ​गर्दी टाळावी: तांत्रिक कारणास्तव हे काम थांबलेले असल्याने लाभार्थ्यांनी कार्यालयात अनावश्यक गर्दी करू नये.
• ​महिनाभराचा विलंब: तांत्रिक बाबींमुळे पुढील एक महिना निधी मिळण्याची शक्यता धूसर आहे.

​घरकुल योजनेच्या हप्त्यांवर अनेक कुटुंबांच्या घरांचे स्वप्न अवलंबून असते, मात्र आता या तांत्रिक पेचामुळे लाभार्थ्यांना काही काळ प्रतीक्षा करावी लागणार आहे.