नायगाव ग्रामीण रुग्णालयात ‘रिपाइं’ (आठवले गट) तर्फे रुग्णांना फळवाटप ; सामाजिक बांधिलकीतून साजरी झाली आंबेडकर जयंती
New Bharat Times नेटवर्क
नायगाव :– भारतीय राज्यघटनेचे शिल्पकार भारतरत्न डॉ. बाबासाहेब आंबेडकर यांच्या जयंतीचे औचित्य साधून रिपब्लिकन पार्टी ऑफ इंडिया (आठवले गट) व्यापारी आघाडीच्या वतीने नायगाव येथे एक स्तुत्य सामाजिक उपक्रम राबवण्यात आला. मंगळवार, १४ एप्रिल २०२६ रोजी येथील ग्रामीण रुग्णालयातील रुग्णांना फळवाटप करून डॉ. बाबासाहेब आंबेडकर यांना अभिवादन करण्यात आले.
केवळ औपचारिकता म्हणून जयंती साजरी न करता, समाजातील गरजू आणि वंचित घटकांपर्यंत पोहोचणे हाच बाबासाहेबांच्या विचारांचा खरा वारसा आहे, ही भावना या उपक्रमातून दिसून आली. रिपाइं (आठवले गट) नांदेड जिल्हाध्यक्ष धम्मदिप भद्रे कांडाळकर यांच्या नेतृत्वाखाली हा कार्यक्रम पार पडला. कार्यकर्त्यांनी रुग्णालयातील प्रत्येक रुग्णाची भेट घेऊन त्यांच्या प्रकृतीची विचारपूस केली आणि त्यांना फळांचे वाटप करत मानसिक आधार दिला.
कार्यक्रमाची सुरुवात डॉ. बाबासाहेब आंबेडकर यांच्या प्रतिमेचे पूजन व पुष्पहार अर्पण करून करण्यात आली. यावेळी जिल्हाध्यक्ष धम्मदिप भद्रे कांडाळकर यांच्यासह सामाजिक कार्यकर्ते राजेंद्र रेड्डी, बलभीम हानवटे आणि परिसरातील भीम सैनिक मोठ्या संख्येने उपस्थित होते.
रुग्णालयातील रुग्ण आणि त्यांच्या नातेवाईकांनी या उपक्रमाबद्दल समाधान व्यक्त केले. “अशा सेवाभावी उपक्रमांमुळे समाजात एक सकारात्मक संदेश जातो आणि डॉ. आंबेडकरांच्या ‘मानवतावाद’ या विचाराला खऱ्या अर्थाने बळ मिळते,” अशा भावना नागरिकांकडून व्यक्त होत आहेत.
