हेडगेवार चौकात नाना पाटेकरांना भावपूर्ण श्रद्धांजली….

प्रभाकर लखपत्रेवार

नायगाव : ज्येष्ठ अभिनेते, दिग्दर्शक आणि संवेदनशील सामाजिक कार्यकर्ते नाना पाटेकर यांच्या निधनाने महाराष्ट्रासह संपूर्ण देशावर शोककळा पसरली आहे. गुरुवारी हेडगेवार चौक, नायगाव येथे नाना पाटेकर यांच्या प्रतिमेस पुष्पहार अर्पण करून भावपूर्ण श्रद्धांजली वाहण्यात आली. यावेळी उपस्थितांनी त्यांच्या अभिनय कारकिर्दीसोबतच सामाजिक कार्याला उजाळा देत त्यांच्या आठवणींना उजाळा दिला.

नाना पाटेकर हे केवळ पडद्यावर भूमिका साकारणारे अभिनेते नव्हते, तर समाजातील वेदना स्वतःच्या मनावर घेणारे संवेदनशील व्यक्तिमत्त्व होते. शेतकरी, दुष्काळग्रस्त आणि गरजू कुटुंबांच्या मदतीसाठी त्यांनी ‘नाम फाउंडेशन’च्या माध्यमातून केलेले कार्य आजही असंख्य लोकांसाठी आशेचा किरण ठरले आहे. संकटाच्या काळात प्रसिद्धीपासून दूर राहून मदतीचा हात देणाऱ्या नानांनी ‘माणुसकी अजून जिवंत आहे’ याचा प्रत्यय समाजाला दिला.

अभिनयाच्या क्षेत्रात त्यांनी आपल्या दमदार संवादफेकीने, प्रभावी व्यक्तिमत्त्वाने आणि प्रत्येक भूमिकेला जिवंत करण्याच्या शैलीने वेगळी ओळख निर्माण केली. ‘नटसम्राट’पासून ‘क्रांतीवीर’, ‘परिंदा’, ‘अब तक छप्पन’ आणि ‘वेलकम’पर्यंतच्या विविध भूमिकांनी त्यांनी प्रेक्षकांच्या मनावर अमिट छाप सोडली. त्यांना तीन राष्ट्रीय चित्रपट पुरस्कार आणि पद्मश्रीसह अनेक सन्मान मिळाले होते.

नानांच्या जाण्याने पडद्यावरील एक महान कलाकार हरपला; मात्र त्याहून मोठी पोकळी एका संवेदनशील माणसाच्या जाण्याने निर्माण झाली आहे. त्यांच्या भूमिका कायम स्मरणात राहतीलच; पण संकटग्रस्तांच्या डोळ्यातील अश्रू पुसण्यासाठी पुढे आलेला ‘नाना’ जनतेच्या मनात कायम जिवंत राहील.

हेडगेवार चौकातील श्रद्धांजलीवेळी वातावरण भावुक झाले होते. उपस्थितांच्या मनात एकच भावना होती—“नाना गेले, पण त्यांनी दिलेला माणुसकीचा संदेश कधीही मरणार नाही.”

नाम फाऊंडेशनच्या माध्यमातून नानांनी राजकीय ७७ लाख शेतकऱ्यांना मदतीचा हात देवून जगण्याचे बळ दिले होते पण यापुढे पाठीवर हात ठेवून लढ म्हणणारे हात राहीले नसल्याची खंत अनेकांनी व्यक्त केली.